DENBORALDIAREN AZKEN TXANPARI EKIN DIOGU
Khalil Khaldoun Reghif eta Unai Barajas Sadornil Gipuzkoako Haur Selekzioarekin
Oporraldiaren ondoren, bueltan gara
Oporretan Klubaren jarduera ez da hutsaren hurrengoa izan, UROLA EKeko ordezkaritza batek parte hartu baitzuen Costa Brava Lloret Cup oinarrizko eskubaloi txapelketaren hamalaugarren edizioan.
Aurreko edizioetan bezain txukun antolatu ez bazuten ere (lehiaketa sistema ez zen oso argia izan, egoitzetara garraiatzeko zailtasunak, emandako zerbitzuen kalitatea ez zen hain ona izan …), espedizioko kideak pozik itzuli ziren esperientziarekin eta helburuak beteta (ondo pasatzea, eskubaloian jokatzeko beste modu batzuk ezagutzea, Klubeko kide izatea sustatzea eta sendotzea).
Gainera, Unai Barajas Sadornil eta Khalil Khaldoun Reghif Gipuzkoako Haur Selekzioarekin aritu ziren eta Hondarribiko Torneoko txapeldun izendatu ziren.
Gainontzean, maiatzaren leheneko zubi honetan, gure talde guztiak, UROLA EK GOIERRI BUS (KN) izan ezik, liga erregularra amaitzeko jardunaldi bat geratzen baitzaio, dagozkien kopan lehiatzen hasi dira. Hiru/lau taldeko multzoetan jokatuko diren kopak eta multzo bakoitzeko txapeldunek finala jokatuko dute garaikurra eskuratzeko ahaleginean.
Azkenik, jakinarazten dizuegu ekainaren 6, 7 eta 8an Irunen jokatuko den Errege Kopa dela eta, Gipuzkoako Eskubaloi Federazioak, RFEBMrekin, Irungo Udalarekin eta Gipuzkoako Foru Aldundiarekin elkarlanean, hainbat jarduera antolatu dituela Gipuzkoako klubentzat (entrenamendu irekiak CB Bidasoa ASOBALeko jokalari eta teknikariekin; teknifikazioak RFEBMrekin; formakuntzak ezberdinak; eskubaloia plazara . . . )
UROLA EK-k jarduera horietako baten egoitza izatea eskatu zuen, eta Ispilla kadete mailako entrenamendurako izendatu dute, bai gizonezkoetan, bai emakumezkoetan. Horrela, maiatzaren 6an, asteartean, 17:30ean neskek eta 18:30ean mutilek, UROLA EK-ko hamar neska-mutil eta parte hartu nahi duten inguruko klubetako bostek, ASOBALeko teknikari eta jokalariekin entrenamendua izango dute.
Era berean, ekainak 1ean benjamin eta alebinentzat Eskubaloia Plazaratu saioak izango dira Zumarragan.
