URNIETAKO BI PUNTUAK UROLA LAZTIRENTZAT
Estutasunik pasa gabe Urnietako KEri eginiko bisitan 27 eta 36 irabazi dute.
Igande kutsua izan duen larunbat honetan garaipen garrantzitsua lortu dute gure lehen taldeko mutilek Urnietan jokaturiko norgehiagokan.
Partidaren hasiera orekatua izan da, baina defentsa sendo batean eta kontraerasotan oinarrituz, UROLA LAZTIko mutilek oreka hori apurtzen asmatu dute. Pixkanaka markagailuak erakusten zuen tartea handituz joan da eta horrela horiek zazpi goleko aldea ezarri dute atsedenera iristean (12 – 19).
Bigarren zatian alde hori handituz joan da eta hamabi goleko tartea izatea ere lortu dute gure mutilek. Hortik aurrera Urolako jokalariek partida kontrolpean izan dute, naiz eta amaiera aldean, bisitarien lasaitzearen ondorioz, etxeko taldeak markagailua zertxobait txukuntzea lortu duen. Amaieran 27 eta 36 UROLA LAZTIren alde eta bi puntuak zorroan zituztela etorri dira Urretxu Zumarraga aldera.
Bi puntu horiei esker taldeak sailkapenaren goi aldean jarraitzen du eta aurtengo denboraldirako jarritako itxaropenak betetzen jarraitzen dira.
Partidak ere izan du bere alde iluna. Norgehiagoka polita osatzen ari zen Xabier Areizagak belaunean min hartu du eta ondorioz zelaia utzi beharrean izan da. Animo Xabi, ez dadila ezer izan, ea datorren astean zelaian ikusten zaitugun.
